Өөртөө ч, өрөөл бусдад ч эдгээр зүйлсийг битгий хэлээрэй.

“Хүрэх, хүрэхгүйн хязгаарыг хүн зөвхөн оюун ухаандаа хамгийн түрүүнд бий болгодог” гэж нэгэн хүн хэлжээ.

Маш олон хүмүүс амжилтанд хүрч, аз жаргал инээд хөөрөөр бялхсан сайхан амьдралаар амьдрахыг хүсч мөрөөдөж явдаг. Харамсалтай бидний ихэнх нь хэзээ ч тэр зүйлдээ хүрч чадалгүй энэ хорвоог орхин оддог нь нэгэнт батлагдсан зүйл. Яагаад вэ? Амьдралд тулгарах олон олон бэрхшээл сорилтуудтай тулгарахаасаа өмнө бид өөрсдийн хамгийн анхны бөгөөд хамгийн хэцүү дайсантайгаа нүүр учрах болдог. Энэ бол бид өөрсдөө. Хүн өөрөө өөрийнхөө хамгийн сайн найз нь бас хамгийн том дайсан нь байж чаддаг ховорхон чадвартай амьтан. Тэгвэл өнөөдөр аз жаргал, амжилтын тэнгэр нь бүрхэг,  амьдрал нь гундуухан яваа тэр л хүмүүст хандаж хэдхэн зүйлийг хэлэхийг хүслээ. Сум нэгийг онодог ч үг мянгыг онодог гэж нэг сайхан мэргэн үг бий. Үүний адил санамсаргүй болон санаатайгаар, ил болон далдаар ямар нэг байдлаар дараах зүйлсийг та өөртөө болон өөр хэн нэгэнд хэлж байсан бол өнөөдрөөс яг одооноос та дахиж бүү эдгээр зүйлсийг хэлээрэй. Учир нь эдгээр зүйлс асаж буй галруу хүйтэн ус цацах шиг л бүхнийг унтраах чадвартай.

 

БИ  ХАНГАЛТТАЙ САЙН БИШ

Мэдээж хүн өөрийнхөө чадал чансаа, авьяас чадварыг бодитоор үнэлж чаддаг байх хэрэгтэй. Хэдий тийм боловч өөрийгөө бодитоор үнэлэх, өөрийгөө доош нь хийх хоёр нь асар өөр зүйлс. Би чадахгүй байна гэж бодох нэг өөр хэрэг, би яаж ч чадах билээ дээ гэж бодох бол огт өөр зүйл. Тиймээс өөрийгөө хангалтгүй гэж бодож явдаг бол өнөөдөр тэр бодлоо хаях хэрэгтэй. Хүн хэзээд хөгжиж, чадварлаг туршлагатай болж чадна.

БИ ГЭР БҮЛ, НАЙЗ НӨХДИЙНХӨӨ ХҮЛЭЭЛТЭД ХҮРЧ АМЬДРАХ ЁСТОЙ

Бусдад инээд, аз жаргал бэлэглэж амьдрана гэдэг маргашгүй сайхан зүйл гэвч та өөрийгөө умартах ёсгүй. Өөрөөр хэлбэл бусдад сайхан сэтгэгдэл төрүүлэхийн тулд өөрөөсөө өөр хэн нэгний дүрд тоглож, өөрийн хүсээгүй зүйлээ хийж, өөрийн хүсээгүй хүмүүстэй хамт байх гэдэг сайн дураар өөрийнхөө аз жаргал, эрх чөлөөг тавиад явуулж байна гэсэн үг. Та зөвхөн өөрийнхөөрөө амьдарч, өөрийнхөө амьдралыг өөрөө авч явах эрх нь танд бүрэн бий.

ХҮМҮҮС НАМАЙГ ЮУ ГЭЖ ХЭЛЭХ БОЛ ГЭХЭЭС БИ ҮНЭХЭЭР АЙЖ БАЙНА

“Таны талаар хэлсэн хэн нэгний увайгүй бодол таны бодит байдал болох албагүй” гэж алдарт Лэс Браун нэгэнтээ хэлсэн байдаг. Таныг хэн ч юу ч гэж хэлсэн бай та л өөрөө хүлээн зөвшөөрөөгүй бол тэдний үг далайд шидсэн чулуутай л адил зүйлс. Үнэндээ та хичнээн сайн сайхан хүн байж олон хүмүүст тус хүргэж зөв амьдарлаа ч гэсэн энэ хорвоо дээр таныг тийм байсны чинь төлөө үзэн ядаж, муулж ярих хүмүүс байж л байгаа. Өөрөө өөрийгөө үнэлэх тэр үнэлэмждээ нөлөөлөх боломжийг өөр хэнд ч битгий олго.

МИНИЙ ХИЙЖ БУЙ ЗӨВ ҮЙЛДЛИЙГ ХҮМҮҮС ХАРААД НАМАЙГ МАГТААСАЙ

Сүүлийн үед энд тэнд “зөв хүний үйлдэл нүднээс далд ч зөв байдаг юм” гэсэн үгс их харагдах болжээ. Хийж буй бүх зүйлсээ хэн нэгнээр үнэлүүлж, хэн нэгэнд хийсэн бүхнээ сайрхан ярьж, хий хоосон магтаалын үгээр өөрийнхөө сэтгэлийг дүүргэхийг хүсэх гэдэг нь аюултай зүйл. Учир нь та энэ байдалд өөрийгөө аваачсанаар цаашид юуг ч чин сэтгэлээсээ хийж чадахаа байх болно. Яагаад гэвэл таны хийж буй ажилд хэн нэгэн онц дүн тавихгүй юм бол би юу ч хийхгүй гэсэн ахархан бодолтой, өчүүхэн дотортой тийм л нэгэн болж хувирна. Тиймээс зөв зүйлийг хийхдээ ирэх шагналд нь болж бус өөрт үлдэх сэтгэл ханамж, бусдад түгээх ач тусыг бодож хийж сурах хэрэгтэй.

МИНИЙ ХУВЬД ОДОО ДЭНДҮҮ ОРОЙТСОН

Биелэгдээгүй мөрөөдөл бус, биелүүлээгүй мөрөөдөл гэж байдаг гэж нэгэн зохиолч шүлэглэсэн байдаг. Үнэндээ одоо бүх зүйл оройтсон, би нэгэнт өнгөрсөн гэх энэ бодол нь хамгийн залхуу, хамгийн шантрамтгай хүмүүсийн хийдэг сонголт. Хэнд ч гэсэн энэ сонголт үргэлж байдаг харин амжилттай хүмүүс энэ сонголтыг хэзээ ч хийдэггүй. Насаараа хэлний багш хийсэн настай багш тэтгэвэртээ гарахдаа хийсэн сонголт нь дахин урлагийн сургуульд сурч зураач болох байсан. Танд ч гэсэн ийм гайхалтай сонголтыг хийх боломж үргэлж бий. Гагцхүү хийх л хэрэгтэй учир нь үхэл л хаяанд ирээгүй бол оройтсон зүйл гэж юу ч үгүй.

БИ МӨРӨӨДЛӨӨ БИЕЛҮҮЛЭХИЙН ТУЛД БҮХНИЙГ МЭДДЭГ БАЙХ ЁСТОЙ

Нэгэн алдарт илтгэгч хэлэхдээ “Амжилтанд хүрэхийн тулд агуу байх шаардлагагүй харин агуу болохын тулд эхлэх хэрэгтэй” хэмээсэн байдаг. Маш олон залуу хүмүүс өнөөдөр өөрийгөө голж, үгүйсгэж, би бэлэн болоогүй гэсэн шалтгаанаар мөрөөдлөө хойш тавин суудаг. Үнэндээ амьдралд хэзээ хаана юу хэрхэн яаж тохиолдох вэ гэдгийг яг таг мэддэг хүн энэ дэлхий дээр байхгүй. Хичнээн нарийн төлөвлөгөө гаргасан байсан ч өөрчлөх шаардлага заавал бий болдог. Гэхдээ хамгийн гол нь эхлэх хэрэгтэй бас төгсгөл цэгээ мэддэг байх хэрэгтэй. Дунд нь танд юу яаж тохиолдох вэ, таны төлөвлөгөө хэрхэн өөрчлөгдөх вэ зэрэг нь тухайн үедээ л болох асуудал. Тэгэхээр өнөөдрөөс яг одооноос мөрөөдлөө биелүүлэх эхний алхмаа шууд хий.

НАДАД БУСАД ШИГ ТИЙМ САЙХАН ЗҮЙЛС ЗАЯАГААГҮЙ

Хүн өөрийгөө өөрөөсөө өөр хэнтэй ч харьцуулах ёсгүй. Та өөрийгөө найз Болдоотойгоо бус та өчигдөр хэн байсан бэ, өнөөдөр хэн байна вэ гэдэгтэй л харьцуулах хэрэгтэй.  Цаашилбал хүмүүс би баян айлын хүүхэд болж төрөөгүй, надад боломж байгаагүй, би авъяасгүй гэх мэтчилэн амьдралд өөрийгөө зөвтгөж нөхцөл байдлыг буруутгаж явах нь олонтаа. Харамсалтай буруутгалаа гээд сайжрах юм юу ч үгүй. Ядуу төрөх нь бус, ядуу үхэх нь хүний буруу байдаг гэж нэг үг байдаг. Үнэндээ бидний амьдралд талархах зүйлс маш олон бий. Энэ хорвоод хүн болж төрснөөс эхлээд өглөө бүхэн тантай хамт манддаг алтан нар хүртэл бидэнд маш олон баярлаж талархах зүйлс бий. Олж харах л хэрэгтэй.

БИ АРАЙ Л ХЯЛБАР АМЬДРАЛААР АМЬДАРМААР БАЙНА

Хүн гэдэг бол нийгмийн амьтан. Тийм болохоор хүн үргэлж өсч хөгжиж, сурч боловсорч байх ёстой хэрвээ ингэж чадахгүй хүн хэзээ ч тайван аз жаргалтай амьдарч чаддаггүй. Харамсалтай нь  энэ хуулийн эсрэг өөрийгөө сорих бэрхшээл бүхнээс зугтааж амьдрана гэдэг нь зүгээр л өөрөө өөртөө мөнхөд сэтгэл дундуур байх тэр сонголтыг хийж байгаатай ижил. Амар хялбарыг нь бус арай илүү чадвар шаардсан ажлыг барьж авч чаддаг байх нь амжилттай хүмүүсийн хамгийн түрүүнд хийдэг сонголтуудын нэг байдаг.

БИ ХЭЗЭЭ Ч УУЧИЛЖ ЧАДАХГҮЙ

Өс хонзон гэдэг бол хоёр иртэй сэлэм л гэсэн үг өөрөөр хэлбэл энэ нь өөрөө хор ууж байж өрөөлийг үхээсэй гэж бодож буйтай нэгэн ижил зүйл. Өнгөрсөн харуусал, өс хонзон, үзэн ядалтыг дотроо тээж явна гэдэг үнэндээ маш хүнд. Хэдий анзаарагддаггүй мэт боловч бидний өдөр тутмын аз жаргал, эрч хүчээс үргэлж хороож байдаг энэ зүйлс бол бидний оюун ухаан сэтгэл санааны паразитууд юм. Уучлах, өршөөх гэдэг мэдээж амар зүйл огтоос биш тийм ч болохоор хамгийн агуу хүмүүс хамгийн энэрэнгүй хүмүүс бас байсан.

БИ ГАНЦААРАА

Амьдралд хэн ч өөрийг тань ойлгохгүй мэт, найзуудтайгаа байвч ганцаар мэт санагдах тэр үеүд тохиолддог. Гэхдээ тэд үнэхээр үнэн үү? Эсвэл зүгээр л түр зуурын гуниг, зовлонгоос үүсэн гарч буй гоморхол юм болов уу?гээд нэг бодоод үзээрэй. Ганцаардал гэдэг зүйлийг бид өөрөө өөрсөд дээрээ авчирдаг. Хүн хүссэндээ л ганцаараа байдаг болохоос бус найз нөхөд, хамаатан садан, гэр бүл, бүр тэжээвэр амьтан хүртэл хань болж чадна. Хэдий таны явж буй замыг ойлгодоггүй, ойшоодоггүй, буруутгадаг тэр бүлэг хүмүүс амьдралд тааралдана. Гэвч энэ дэлхий 7 тэрбум хүнтэй гэдгийг та бас битгий мартаарай. Нэг хүн ойлгохгүй байлаа, таныг ганцаардууллаа гэхэд дахиад цаана нь 6,999,999,999 хүн таны мөрөөдлийн талаар хараахан сонсоогүй байгаа гэдгийг танд сануулъя.

 

Ингээд энэхүү цуврал маань энд хүрээд өндөрлөж байна. Уншигч таныг энэ нийтлэлүүдээс багахан ч гэсэн сэдэл авсан байх гэдэгт найдаж байна. Эцэст нь хэлэхэд амьдралд та өөрийнхөө хамгийн сайн найз бас хамгийн том дайсан байдаг гэдэг нь гарцаагүй үнэн. Гэхдээ уншигч таныг өөрөө өөрийнхөө найз байгаасай гэж миний бие хичээнгүйлэн хүсч байна тэгээд танд амжилт хүсье.

 

“Хүсэл мөрөөдөл байгаа цагт хүрэх хязгаар тэнгэрт л буй.”

 

About Sukhee

Өөрийгөө хөгжүүлэхийг хүсдэг, илүү дээр амьдралыг бүтээн бий болгохыг хүсдэг, үргэлж өчигдрөөс илүү өнөөдрийн төлөө тэмүүлдэг хүсэл мөрөөдөл, гэрэл гэгээ дүүрэн тэр л амьдралыг ганцхан танд ч болов өгөх гэсэн асар том зорилгын төлөө энэхүү сайтаа 5 жилийн турш ажиллуулж байна.

3 thoughts on “Өөртөө ч, өрөөл бусдад ч эдгээр зүйлсийг битгий хэлээрэй.

  1. Үнэхээр ойлгомжтой голыг нь олсон сайхан нийтлэл байна.Баярлалаа заавал хэрэгжүүлнэ ээ

Таны сэтгэгдлийг сонсъё.

This site uses Akismet to reduce spam. Learn how your comment data is processed.